پاش سەرهەڵدانی راپەڕینی ژینا کە بە هەموو پێوەرێکی کۆمەڵناسیی سیاسی و فەلسەفی دەکرێ مۆرکی شۆڕشێکی گەورەی کۆمەڵایەتی و سیاسی لێ بدەین، جگە لەوەی لەباری دەروونییەوە هەموو تاکێکی تووشی جۆرێک لە شۆک، سڕ بوون و دۆشدامان کرد، کۆمەڵێ ویست و حەزی دژبەیەکی لە تاکی کورددا ساز کردوە، لە ترس، مردن، گرتن و بێدەسەڵاتییەوە بگرە تاوەکو شکۆ، هیوا، ئازادی و رزگاری، بەڵام لەباری سیاسی و کۆمەڵایەتییەوە پاش زیاتر لە ١٠٠ رۆژ بەرگری و خۆڕاگری بێ وێنەی خەڵک، پێویستە راوەستەیەک بکەین لە دۆخی ئێستامان.
شۆڕشی ژینا هەر لە یەکەم رۆژەوەو لە سەر گۆڕی ژینای جوانەمەرگ تاوەکوو ئێستاش، لەسەر یەک کۆڵەکەی سەرەکی بەندە، ئەویش ژن، ژیان، ئازادییە. ئەم دروشمە پڕناوەڕۆکە تەنیا بریتی نییە لە سێ وشەی یەکانگیر و هاوکێش، بەڵکوو سێ وشەی پڕناوەڕۆکن کە وەک ستراتێژیی شۆڕشی ژینا رەچاو دەکرێت. لە راستیدا ژن، ژیان، ئازادی هەوێنی شۆڕشێکە کە بە پێچەوانەی جموجۆڵ وشۆڕشەکانی تری پێش خۆی کە بۆ سازکردنی دونیایەکی تر روویان لە رابردوو بوو، وە هەمان رابردوشیان وەک سەرچەشن بۆخۆیان دیاری کردبوو، رووی لە داهاتووە، ژن ژیان ئازادی جۆرێکە لە دابڕان لە رابرودو هەروەها نەفی کردنی رابردوو.
هەر لەسەر هەمان نەفی کردنیشە دەیهەوێ دونیاییەکی نوێ ساز بکات، دابڕانە لە هەموو ئەو پێناسەو ئاراستە و ریزبەندییە سیاسی و کۆمەڵایەتییانەی کە تووشی داڕمان و داڕزان بوون، تێپەڕینە لە هەست بە بەرپرسیارەتی نەکردن چ بە تاک و چ بە رێکخراوە، تێپەڕینە لە ئەو خۆ نەبان کردن و خۆ بە بەرپرسیار نەزانینەی رێکخراوە سیاسیەکان لە ماوەی ١٠٠ رۆژی شۆڕشکەدا. دابڕانە لە سیستەمی کۆیلایەتی بە نیسبەت دەوڵەت و تێپەڕین لە سیستەمی باوک سالاری، پیاوسالاری، خێل پەروەری، گزیرپەروەری و ناشایستەسالاری بە نیسبەت کۆمەڵگا و رێکخراوە کۆمەڵایەتی و سیاسییەکانی.
مێژوو کەژاوەیەک نییە کە لە شوێنێکی دیاریکراوەوە دەستی پێکردبێ و شوێنی مەبەستی بۆ دیاری کرابێ، رەوتی مێژوو پڕە لە دابڕان و تێپەڕین، دابڕان و تێپەڕاندنەکانیش بەرهەمی رەوتێکی دیالێکتیکیی کۆمەڵایەتییە، کە هیچ کات ئەمڕۆی وەک دوێنێ نییە. شۆڕشی ژیناش لەسەر هەمان رێچکەیە.
شۆڕشی ژینا یان بە دەربڕینێکی گونجاوتر بزوتنەوەی ژن، ژیان، ئازادی تەنیا بزوتنەوەیەکی سیاسی بۆ ئامانجێکی دیاریکراوی سیاسی نییە، بەڵکوو بزوتنەوەیەکی کۆمەڵایەتی سیاسی بەرینە کە چ لە فوڕم، چ لە ناوەڕۆک و چ بە کردارو گوتاریش لە مێژووی ئێران و کوردستانیشدا ناوازەیە، کە تێیدا بۆ یەکەم جارە رووی رەخنەو تەوسی هەم لە حکومەتە وهەم لە کۆمەڵگا.
بکەرە سەرەکییەکانی ئەم بزوتنەوەش وەک رەوتەکانی پێشتر، تەنیا گروپێکی پرۆفێشناڵی شۆڕشگێری رێکخراو نین. بکەرانی سەرەکی شۆڕشی ژینا پێکدێت لە کۆمەڵە گروپ یان کۆمەڵی بچوکی لە یەک تەنراوی ناپرۆفێشناڵ کە پێک دێن لە ژنان یان کچان، لاوان و خوێندکارانی زانکۆکان و مامۆستایان، کە هەبوونی دۆخی هەنوکە یان پاراستنی دۆخی هەنوکە لە بەرژەوەندیاندا نییە، لەباری ئابوریشەوە لە ژێر هێڵی هەژاریدا دەژین و هیوابڕاون لە داهاتوو، هەر بۆیەش هەڵگری دروشمێکی نوێ و سەردەمیانەن.
بە سەرنجدان بەو بارودۆخە نوێیە، قەیرانەکانی ئێرانیش لەبواری سیاسی، ئابووری و کۆمەڵایەتی چ لە ئاستی ناوخۆ و دەرەوەش
ڕۆژ لە دوای رۆژ قۆڵتر ئەبێتەوە. رەوتە جیاوازەکانی ئۆپۆزسیۆنیش لە سەر ئاستی جۆراوجۆر کەوتونەتە جموجۆڵ و ئاراستەکان هەر یەکەو بە دوای بەرەی دڵخوازی خۆیدا دەگەرێ.
بزووتنەوەی ژن ژیان ئازادی، پرسی کوردی لە ئێران، ناوچەکە و جیهان بردۆتە ئاستێکی دیار و کاریگەر. لە رۆژهەڵاتی ناوەڕاست کورد کە هەمیشە قوربانی و ستەملێکراو بووە، دەرفەتی گەورەی لە هەموو لایەکەوە بۆ هاتۆتە پێش، سەرەڕای هەرەشە بەردەوامەکان، خەریکە نەخشەی هێزەکانی ناوچەکە بە قازانجی کورد تێکدەچێ و بکەری سیاسی نوێ پەیدا دەبێ. لەهەلومەرجێکی وادا، بۆ خوێندنەوەو لێکدانەوەی دەرفەت و هەرەشەکان، بینینی مەترسی و بەرژەوەندییە باڵاکانی پێوەند بە پرسی کورد، دامەزراوەی چار، وەک دەزگایەکی راگەیاندن و توێژینەوە دەست بەکاربوونی خۆی رادەگەیەنێ. دەست بەکاربوونی دامەزراوەی چار، هاوکاتە لە گەڵ هەشتی مارس واتە رۆژی جیهانی ژن، بۆیە هەر بەو بۆنەیەوە گەرمترین پیرۆزبایی خۆمان ئاراستەی ژنانی کۆڵنەدەری کوردستان، ژنان و کچانی بەشدار لە شۆڕشی ژن، ژیان، ئازادی دەکەین و دامەزراوەکەمان بە هەموو شێوەیەک پاڵپشت و هاوکاری گەیاندنی دەنگی ئەوان دەبێ بۆ هاتنەدی کۆمەڵگایەکی دادپەروەر و یەکسان کە ژنان و کچانی نەبەزیوی کوردستان هەموو ماف و ئازادییەکیان تێیدا پارێزراو بێ.
لێرەوە داوا لە نوسەران، توێژەران، چالاکوانان و تێکۆشەرانی کوردستان دەکەین کە دامەزراوەی چار بە هی خۆیان بزانن و لە نووسین و تێبینی و رەخنەو هاوکاری و پاڵپشتیەکانیان بێبەشمان نەکەن.
سەرکەوێ شۆڕشی ژن ژیان ئازادی
بژی رێبەرانی مەیدانی ژن ژیان ئازادی
